پیش لفظ
مجھے خود پر شرم آتی ہے۔ اس بات پر شرم آتی ہے کہ اوائلِ جوانی ہی سے اپنے آپ کو غالب کی شاعری کا سنجیدہ پرستار سمجھنے، ان کی زندگی اور فن پر کئی کتابیں پڑھ رکھنے، اور ان کی کئی غزلیں زبانی یاد ہونے کے باوجود مجھے تھوڑا عرصہ پہلے تک یہ معلوم نہیں تھا کہ میں تین عشروں تک غالب کے جس دیوان کا گرویدہ رہا، وہ ان کے کل کلام کا نصف حصہ بھی نہیں۔ مجھ پر اس بات کا انکشاف اس وقت ہوا جب میرے ہاتھ نسخۂ حمیدیہ کا مخطوطہ لگا۔
 
میں اسی مغالطے کا شکار رہا کہ غالب نے مقدار پر معیار کو فوقیت دیتے ہوئے اپنے ہم عصروں کے مقابلے پر بہت کم غزلیں لکھی ہیں، اور یہ کہ ان کا متداول نسخہ ہی ان کا کل اردو کلام ہے۔ مجھے اب اندازہ ہوا ہے کہ میں اپنی لاعلمی کی وجہ سے ان کی حیرت انگیز دنیا کے نصف حصے سے یکسر محروم تھا۔
 
خوش قسمتی سے، یا شاید بدقسمتی سے، مجھے معلوم ہوا کہ میں اکیلا نہیں ہوں۔ غالب کے بیسیوں چاہنے والوں سے بات کرنے کے بعد مجھے پتہ چلا کہ لگ بھگ وہ سب کے سب اسی کشتی کے سوار ہیں۔ میرے تقریباً کسی دوست کو ان ’اضافی اشعار‘ کے بارے میں معلوم نہیں تھا۔ ایسا کیسے ممکن ہے؟
 
ممتاز ماہرِ غالبیات ڈاکٹر مہرافشاں فاروقی سے رابطہ کرنے کے بعد مجھے معلوم ہوا کہ ماہرینِ غالب ان اضافی اشعار سے اس وقت آگاہ ہوئے تھے جب 1921 میں یہ ’نسخہ‘ دریافت ہوا تھا۔ اس کے علاوہ مجھے معلوم ہوا کہ کچھ اور بھی ایسے گمنام ’نسخے‘ عشروں سے موجود ہیں جن کے اندر ’متداول‘ دیوان کے علاوہ اضافی اشعار پائے جاتے ہیں۔ لیکن ان نسخوں پر کسی کتب خانے کی گرد جمع ہوتی رہی ہے یا پھر یہ کسی عالم کے طاقِ نسیاں پر دھرے کے دھرے رہ گئے ہیں۔ تو کیا ہم غالب کے متوالے پوری طرح سے متوجہ نہیں تھے؟ یہ اشعار ہماری زندگیوں کو مالامال کرنے کے لیے ہم تک کیوں نہیں پہنچ سکے؟
 
وجوہات چاہے جو بھی رہی ہوں، جن کا ذکر ڈاکٹر مہر فاروقی نے اپنے دیباچے میں بڑی وضاحت سے کیا ہے، میں نے اس کڈھب معمے کو حل کرنے کا بیڑا اٹھایا ہے۔ میں نے ’غالب کی بازیافت‘ کی مہم شروع کی ہے جس کے تحت کوشش کی جائے گی کہ غالب کے مخفی خزانے کو ماہرینِ غالبیات کے دائرے سے نکال کر عام لوگوں کی زندگیوں میں نئے جذبات کا رنگ بھرنے کے لیے پیش کر دیا جائے، اور غالب کے چاہنے والوں کے ہمراہ اس ’جنتِ گم گشتہ‘ کے انوکھے سفر پر روانہ ہو کر دنیائے غالب کا نقشہ ازسرِنو مرتب کیا جائے۔ میرے ذاتی کتب خانے سے نسخۂ حمیدیہ کے ہوبہو عکس کی ڈیجیٹل اشاعت اسی سفر کا انشااللہ پہلا قدم ہے۔
 
یہ کام کسی ایک شخص کے بس کا نہیں تھا۔ غالب کی بازیافت کی مہم کو تقویت دینے کے لیے ہم سب کو اس میں حصہ لینے کی ضرورت ہے۔ ہمیں ان ’نئی‘ غزلوں کو پڑھنے اور انھیں ایک دوسرے کو سمجھانے کی ضرورت ہے۔ ہمیں ماہرین اور شائقین چاہییں، جو ترجمے، تشریح اور تفسیر کو آن لائن پھیلا سکیں۔ ہمیں نئے، پرانے، منجھے ہوئے فنکاروں کی ضرورت ہے جو یہ گمنام غزلیں گا سکیں۔ ہمیں غالب کے حالاتِ زندگی سے معلوم ہوتا ہے کہ انھیں اسی وقت شاعر مانا گیا جب ان کی غزلیں کوٹھوں پر گائے جانے لگیں۔ غالب کو ازسرِ نو دریافت کرنے کے لیے ہمیں کوٹھوں کی جگہ انٹرنیٹ اور میوزک کمپنیوں کی مدد سے یہ روایت ایک بار پھر دہرانا پڑے گی۔  یہ سب کچھ، اور اس کےعلاوہ بہت کچھ اور کرنے کے بعد ہی اپنی اگلی نسلوں تک وہ حظ و انبساط کی کیفیت پہنچائی جا سکتی ہے جس سے ہم محروم رہے ہیں۔
 
’غالب کی بازیافت‘ کی مہم کے باضابطہ آغاز کے لیے میں ذیل میں ڈاکٹر مہر افشاں فاروقی کی اجازت سے ان کا ترجمہ و تشریح کردہ شعر نقل کر رہا ہوں جو گدڑی میں چھپے لعل کے مصداق غالب کے متداول دیوان میں موجود نہیں ہے۔  
 
ایک مجلد مخطوطے سے ڈیجیٹل کاپی تیار کرنا تکنیکی طور پر آسان کام نہیں تھا، لیکن اس بات کی پوری احتیاط برتی گئی ہے کہ مخطوطے کو جس حد تک ممکن ہو، اس کی اصل شکل و شباہت، جسامت اور حالت میں پیش کیا جائے۔ ہم نے جان بوجھ کر مخطوطے کے اندر پائی جانے والی کئی خرابیوں کو ٹھیک کرنے کی کوشش نہیں کی۔ خوش قسمتی سے یہ مخطوطہ ہر طرح کے حالات سے گزر کر ہمارے پاس موجود ہے اور ہم اس سے لطف اندوز ہو سکتے ہیں۔
 
آپ کے ہاتھوں میں یہ تاریخی دستاویز ہے، جس پر میں آپ کو مبارک باد پیش کرتا ہوں، اور ایک بار پھر درخواست کرتا ہوں کہ آپ اس کے اندر موجود اشعار کو باہر نکال کر اپنے گھروں اور اپنے دلوں میں بسا لیں۔
 
شہاب ستار
ڈھاکہ، اکتوبر 2015